جميع انواع العزل ,كيفية استخدام كل نوع ,الاختبارات اللازمة للعزل

العزل المائي “عزل الأساسات – الحمامات – المطابخ” : * بيتعمل للأساسات والأسطح والخزانات . وبالنسبه للحمامات والمطابخ بيتعمل قبل الصرف الداخلي وبند السيراميك . ولازم تستلمه صح عشان ميجيش بعد وقت ويحصل تسريب.

– أنواع عزل الرطوبه :

* بيتومين علي البارد. * بيتومين علي الساخن. * لفات الميمبرين. * العزل الكيميائي “أساسه أسمنتي”.

– عزل الأساسات :

في عزل القواعد المنفصله والسملات مش هنقدر نستعمل شيتات الميمبرين . لإن الميمبرين عباره عن لفه عرضها 1م وطولها 10 م . ومش هنعرف نشكلها بحيث تاخد شكل القواعد المنفصله فهنحتاج عزل بيتدهن . بحيث نقدر نوصله لكل مكان في القواعد . للمزيد اضغط هنا

والعزل اللي بيتدهن بيكون إما بيتومين ساخن وإما عزل أسمنتي . لكن العزل الأسمنتي غالي ومش بنستخدمه دايماً في عزل الأساسات . بنستخدمه في عزل المنشآت المائيه . والخزانات ونستنج من كده إن عزل القواعد المنفصله والسملات بيتعمل بإستخدام البيتومين الساخن .

وفي حاله لو كانت الأساسات عباره عن لبشه ممكن نعمل العزل بالبيتومين الساخن أو بإستخدام شيتات الميمبرين.

– البيتومين عباره عن براميل بنسخنها ونشتغل منها . لكن مش بنستخدم البيتومين لوحده ولازم يتخلط معاه ماده مصلده “بنخلط معاه البيتومين المؤكسد .

– نسبه العادي للبيتومين المؤكسد 2 : 1 . ولازم الخلط يتم قصادك لإن في الغالب المقاولين مش بيحطوا البيتومين المؤكسد . لإنه أغلي من البيتومين العادي .

– البيتومين بيحصل فيه غش وهتلاقي مقاولين وصنايعيه بتحط عليه زيت عربيات ومواتير . علشان يزودوا حجمه . وناس بتحط عليه صابون سايل . علشان ينزل يتزحلق علي الخرسانه . ويدي معدلات فرد أكبر . أو يرشوا مياه علي الخرسانه عشان العزل يتزحلق ويفرد أكتر . وده هندسياً مرفوض تماماً.

– إفرض إن خلطه العزل إتعملت وإتدهن وأنا مش موجود وهنزل إستلمه إنهارده، المفروض أخد بالي من إيه؟

لازم العزل يكون لامع مش مطفي . لإن الإضافات اللي بتتحط عليه بتخليه مطفي . ولازم لما تحط إيدك عليه تلاقيه مبيلزقش في إيدك . وبتجيب مسمار تغرزه في العزل . ولازم تحس إن العزل له تخانه مش أول ما تحط المسمار تحس إنه خبط في الخرسانه.

البيتومين لازم ندهن بيه الخرسانه وش . ونسيبه ينشف وبعدين ندهن وش تاني . وبيتم دهان وشين عزل عشان نضمن إن مافيش حراميه . “حراميه يعني المناطق اللي موصلهاش عزل والخرسانه لسه مكشفه”.

برميل البيتومين لازم أتأكد إنه جاي كامل لإني أوقات هلاقي البرميل جاي ناقص 10 سم أو 20 سم. * البرميل الكامل بيفرد 70 م2 “وش واحد”.

– أنواع العزل المائي اللي ممكن نستخدمه في الحمامات والمطابخ والأسطح :

1- العزل بإستخدام لفف الميمبرين : –

عباره عن لفه بعرض 1 متر وطول 10 متر وبسمك 3 أو 4 مم وبتفرد 8 م2 . عشان بيكون في ركوب . بفرده علي الأرضيه وبركوب ما بين الشربحه والتانيه 10 سنتي وبلزقه بإستخدام النار “الباشبوري”.

2- العزل الكيماوي “شيكاره + جركن ماده سائله” : –

عباره عن شيكاره تحتوي علي أسمنت خاص بالعزل . ولونه نفس لون الأسمنت تقريباً . وجركن به ماده سائله بيتم خلط الأتنين علي بعض . وبدهن بيه الأرضيه بعد تجهيزها

“بستخدم Master Seal 599”. – يتم عزل الحمامات والمطابخ بإستخدام لفف الميمبرين فقط . أو بإستخدام العزل الكيماوي فقط . أو ممكن نعزل بإستخدام الاتنين . “نعمل عزل كيماوي الأول . ونعمل فوقه لفف الميمبرين – لو إنت شغال في برج خليفه – علي حسب المواصفه يعني”.

– التجهيزات اللي هنعملها قبل ما نبدأ في العزل :

1- قبل ما تبدأ في أي حاجه . هتجيب السباك يكسر مكان تركيب مواسير صرف الحوض والغساله في الحائط . ويركب مخرج ماسوره صرف الحوض والبيبه . لازم يركب ماسوره المخرج قبل العزل . علشان لو مركبتوش هيجي بعد العزل وهيضطر يقطع في العزل في الوزره أو رقبه الأزازه . علشان يركب الماسوره ودي هتبقي منطقه ضعف . وممكن تسرب ميه وهتخش في موضوع ترميم العزل.

2- بعد كدا هيكنس أرضيه الحمام بالمقشه لإزاله أي أتربه أو كسر.

3- هيبدأ في عمل لياسه للأرضيه عشان تبقي مستويه تماماً . ومفيهاش أي نتوءات “لياسه بعمل مونه لباني” . وهيعمل رقبه إزازه بالمونه عند إتصال الأرضيه بالحائط . عشان تبقي واخده شكل كيرف . لمنع إنقطاع الميمبرين في المنطقه دي .

وهيعمل وزره بالمونه إرتفاع 10 سم في الحائط . ويحلقم “يحلئم” كويس بالمونه حول مخرج الماسوره.

– رقبه إزازه “وزره” : إتصال الحائط بالأرضيه بيكون عامل زاويه قايمه

– بعمل مونه في المنطقه دي وأخليها واخده شكل كيرف . علشان لما أركب شرائح الميمبرين أحافظ عليه من القطع . وتبقي مريحه ومش مهوي تحتها ومتبقاش منطقه ضعف . دي إسمها رقبه إزازه. – حلئمه يعني يقفل الفراغات حول الماسوره بالكامل بالمونه . أو يلزق الميمبرين كويس حول الماسوره.

4- هات شيكاره العزل وإخلطها بالماده السائله . ثم وإبدأ في دهان الأرضيه وسيبها تنشف “بيتم دهان وشين -إتجاه الوش التاني يكون عكس دهان إتجاه الوش الأول.

5- تاني يوم نبدأ في العزل بإستخدام لفف الميمبرين، يتم فرد اللفه علي الأرضيه وعمل ركوب 10 سم ما بين اللفه واللي جنبها

ونستخدم الباشبوري “النار” في لحام الإتنين مع بعض ونعمل وزره بالميمبرين إرتفاع 10 سم ونكوي “نلزق” العزل كويس علي الحائط. – ويقفل كويس حول مخرج الماسوره بالميمبرين وبإستخدام الباشبوري عشان دي منطقه ضعف كبيره.

– إختبار العزل : – يتم ملئ الحمام أو المطبخ بالمايه بإرتفاع 5 سم علي الأقل لإختباره اذا كان هناك تسريب أو لأ ويترك لمده يومين ونشوف هل هناك تسريب في سقف البلاطه في الدور السفلي ولا لأ.

ثم بعد إختبار العزل وضمان جودته بعدم التسريب يتم عمل طبقه حمايه “طبقه لياسه” للعزل لعدم حدوث أي خدوش أو قطع في العزل والحفاظ عليه. – حلئم كويس جداً حول مخارج المواسير بالميمبرين وإلحم مسافه الركوب كويس جداً لإن دول أهم مناطق في العزل واللي ممكن يحصل عندها تسريب.