كل مايخص السملات أو الميد , فائدة السملات ,تسليح السملات

كل مايخص السملات أو الميد , فائدة السملات ,تسليح السملات

السملات ما هي إلا كمرات تقوم بربط الأعمدة علشان كدة بيسموها الـ Ground Beams

كتاب كيفية اختيار الاساسات طبقا لنوع التربة

💫💥السملات ممكن تربط الأعمدة في منسوب القواعد و ممكن تربط الأعمدة في منسوب رقابي الأعمدة
👌👌مفيش فرق بين سمل و ميدة بس فيه فرق بينهم و بين الشداد

السملات فائدتها :-

👌1- حمل حوائط البدروم أو الدور الأرضي
👌2- تربيط القواعد لمقاومة الهبوط الجزئي
👌3- مقاومة رد فعل التربة في حالة وجود مياة جوفية
👌4- تحميل كمرة بادي السلم

إزاي أحط السملات في لوحة الأساسات :

⚡⚡1- أول حاجة تعملها إنك تجيب المسقط الأفقي لمعماري البدروم أو الأرضي لو مفيش بدروم و تسقطه علي لوحة الأساسات و تحط تحت كل حائط معماري سمل

⚡⚡2- هنربط كل قاعدة في الإتجاهين لازم
( الأعمدة الركنية لازم تتربط بسملين علي الأقل – الأعمدة الطرفية لازم تتربط بـ 3 سملات علي الأقل – الأعمدة الوسطية لازم 4 سملات علي الأقل)
( علشان كدة ممكن نضطر نعمل سمل شايل سمل علشان مفيش قاعدة علي نفس خط القاعدة اللي عاوز أربطها)
( أو علشان كدة ممكن أعمل سمل مايل أو مشطور علشان مفيش قاعدة علي نفس خط القاعدة اللي عاوز أربطها)

⚡⚡3- هنوقع قلبة السلم علي لوحة الأساسات لو لقينا القلبة طالعة من قاعدة خلاص مش محتاجة سمل أما لو لقيت القلبة جاية بين القواعد بعمل سمل علشان أحمل عليه أشاير بادي السلم و كمرة بادي السلم

السمل المشطور أفضل من السمل المحمول علي سمل

لأن السمل المشطور ماسك عمودين فيقاوم الهبوط الجزئي أفضل

💫 السملات ممكن تربط الأعمدة في منسوب رقابي الأعمدة (علي العالي ) فوق القواعد . و ده ممكن في حالة إن يكون إرتفاع العمود كبير و خايف يحصل Buckling كبير للعمود فا عن طريق وضع سملات في منسوب رقابي الأعمدة كدة إحنا بنقلل الـ Buckling Length
💫السملات الي بتربط الأعمدة في منسوب القواعد أفضل – من وجه نظري – لأنها بتقاوم الهبوط الجزئي أفضل و علشان بتساعد في زيادة جساءة المبنى في مقاومة قوي الزلازل و خصوصاً إن الزلازل عبارة عن هزة أرضية فأول حاجة بتقاومها و بتتأثر بيها هي السملات

💫السملات لو أنا حاططها علشان أشيل عليها حائط بس فهلاقي المومنت بتاعي زي الكمرات العادية سفلي في نصف البحر علوي عند الأعمدة و بالتالي في الحالة دي . هلاقي إن الحديد السفلي أكبر من الحديد العلوي
💫 ثم السملات لو أنا حاططها علشان أقاوم رد فعل التربة الناتج المياة الجوفية فهلاقي المومنت بتاعي عكس الكمرات العادية علوي في منتصف البحر سفلي عند الأعمدة . و بالتالي في الحالة دي هلاقي إن الحديد العلوي أكبر من الحديد السفلي

💫 لذلك ثم السملات لو أنا حاططها علشان أقاوم الهبوط الجزئي فهلاقي السمل عليه مومنت سفلي و علوي و بالتالي هلاقي حديد فوق و تحت زي بعض
💫ثم السملات في الغالب بستخدمها علشان تقاوم الـ 3 حاجات دول . فعلشان كدة في الغالب بلاقي إن تسليح السملات فوق زي تحت

💫السملات المفروض اللي يصممها مهندس التربة لأنها بتتصمم علي فرق الهبوط فلازم أكون عارف الهبوط بتاع التربة كام
💫السملات في المشاريع الإعتيادية العادية جدا ( عمارة سكنية – فيلا صغيرة ) في الغالب بلاقي تسليح السملات 4 فاي 16 فوق و تحت (و طبعا ده مش علي طول)

بالنسبة لكانات السملات

في الغالب بنستخدم كانات عادية للتربيط بتكون في الغالب 6 فاي 8 و في أغلب الأحوال مبيكونش فيه داعي لتكثيف الكانات عند وش العمود لأن قيمة الشير مش بتكون كبيرة أوي
💫كانات العمود بتسمر و كانات السمل بتقف علي وش العمود
💫 السملات عرضها بيكون في الغالب 25 سم و ساعات 30 سم و أوقات صغيرة بيكون 15 سم

💫السملات سمكها بيكون نفس سمك القواعد لو القواعد 60 سم السملات بتكون 60 سم برضه
💫السملات سمكها نفس سمك القواعد طب لو عندي القواعد معظمها 60 سم و بعض القواعد 70 سم أعمل إيه ؟
في الحالة دي لو السمل رابط بين قاعدتين 60 سم بيكون 60 سم و لو رابط بين قاعدتين 70 سم بيكون 70 سم
أما لو رابط بين قاعدتين واحدة 60 سم و الثانية 70 سم بعمل السمل علي الكبير اللي هو الـ 70سم و بيركب الفرق ده علي العمود .
للمزيد من المواضيع المشابهة اضغط هنا

الغطاء الخرسانى في السملات

من العرض بيكون 2.5 سم و من فوق ومن تحت بيكون 5 سم
💫 وصلات السملات علي حسب إستخدام السمل بس في الغالب السمل بيستخدم في كل حاجة فبيكون السمل كله معرض لشد فوق و تحت و في أي مكان فبالتالي لازم وصلاتي كلها تكون وصلات شد يعنى 60 فاي و تكون بالتبادل
( و رأي الغير ملزم إطلاقاً إن أنا ممكن أعمل وصلات السملات زي الكمرات عادي جدا سفلي عند الأعمدة علوي في منتصف البحر بس تكون وصلات شد)

💫 أوعي تعمل الوصلات السفلية و العلوية في نفس المكان
💫العمود هو الـ Support للسملات فبالتالي لازم حديد السمل يستمر حتي العمود و يمتد من بعد العمود مسافة Ld

يكفي إن حديد السملات يعدى العمود مسافة Ld ملوش لازمة حديد السملات يكمل حتى نهاية القاعدة

لو طول السمل كبير هيحصلة Deflection فعلشان أتفادي ده هستخدم مخدات من القواعد العادية تحت السمل.