ماهية المواد والعناصر الانشائية في البناء

ليه انا بستخدم الخشب والحديد والخرسانه ؟ في اخر المقال لينك لتحميل كتاب اسباب صدأ الحديد وكيفية علاجة

ليه التسليح للعناصر الانشائيه المختلفه بيبقي عامل كده يعني تسليح (القواعد Footings – الاعمده Columns -السملات والكمراتBeams and Ground Beams – الاسقف Slabs -الفريمات Frames -والارشات Arch Girder , Arch slab ..الخ) ؟

ليه بعمل غطاء خرساني للعناصر الانشائيه المختلفه ؟
يعني إيه أحمال جانبيهLateral Loads وليه اسمها كده ؟ ماهية المواد والعناصر الانشائية في البناء.

مثلا لو قعدت كده وفكرت مع نفسك شويه هتلاقي ان سبحان الله كل حاجه صناعيه مشتقه من حاجه ربنا خلقها ..يعني عندك مثلا إحناا .. مكونين من جلد .. وعظام .. وشعيرات دمويه .. وان ال Structure بتاعنا مكون من قدم (Foot=Foundation) ..ورجلين (Legs =Columns )..وقيس علي هذا الاساس ..

دلوقتي عشان أكون مجسم له شكل معين محتاج قالب عشان اشكل عليه المجسم دا .ومحتاج ماده مالئه عشان تاخد شكل المجسم … يعني ايه ؟
لقراءة المزيد من المعلومات المشابهة اضغط هنا

يعني مثلا لو عاوز اعمل مجسم دائري Circular Shape .. فحتاج أول حاجه اني أعمل قالب نفس الشكل دا Form .. وطبعا القالب دا بيكون له أبعاد ومقاسات يعني مثلا في القالب الدائري محتاج تعرف القطر Diameter والارتفاع Height .

وبعد ما القالب يجهز بتحتاج تقويه عشان لما تيجي تملاه بالماده المالئه طبعا بتعمل حمل علي قاعده Base القالب وعلي الاجناب Sides ..وبعد ما الماده المالئه تنشف بتفك القالب وبترشها مايه عشان تنتعش ..

نفس الفكره عندنا للمنشأت .. يعني لما تكون عاوز تعمل قاعده مثلا Footing فبتجيب الخشب Wood عشان تقولب الشكل من هنا جه اسم Formwork ..للشده الخشبيه .. والطبيعي ان شكل القاعده هو نفسه شكل القالب يعني مكونش عاوز قاعده مربعه فنعملها قالب دائري

الفرمة والقالب

فبعد ما أخلص الشكل العام للقالب بحتاج اني اعمله تقويه قبل ما أملئه بالماده المالئه اللي هيا عندنا هتبقي الخرسانه Concrete .. وبعد ما الخرسانه تنشف بفك الشده وارشها مايه عشان تنتعش ..وتعوض المايه الممتصه . ..

يعني اذا لو بعمل مثلا Arch Slab فمحتاج قالب علي نفس الشكل ونفس الشىء لو هعمل مثلا Frame او Beam او Slab ..الخ ..

ثم طيب دلوقتي عندي الخرسانه (جلد المنشأ ) مكونه من مواد زي الاسمنت Cement والركامAggregate مكون من رمل Sand وظلط Gravel وعندي ماء Water ..
طيب كل ماده من دول عنده حاجه اسمها “معامل التمدد ” يعني ايه ؟
مثلا يعني كل ماده عايزه تاخد راحتها في مكانها فبيحصل شد وجذب وحركات وبالتالي دا بيسببلي مشكله فالخرسانه وهيا “الشروخCracks ” لان مقاومه الخرسانه لقوي الشد Tension ضعيفه .طيب ايه الحل ؟

مثلا لو معندكش عضم تحت جلدك أي هرشه او شده او خبطه جلدك هيحصله مشاكل فعشان كده ربنا سبحانه وتعالي زودنا ب”Bones ” العضم ..

الحديد

مثلا العضم بتاع الخرسانه هو “الحديد Steel” .. بيكون موجود تحتها وبيقاوملي قوي الشد اللي بتحصل وعلفكره بيقاوم ضغط كمان جامد جدااا بس لا يفضل ((إقتصااديااا)) لانه غالي ومقامه عالي .

وطبعاا لو العضم (Steel)_ دا مكشوف هيحصله مشاكل فلازم يتغطي بالجلد (Concrete). اللي هو عندنا الغطاء الخرساني Covers . يعني الخرسانه عندنا هيا الجلد Skin للمبني والحديد هو العضم Bones .

رأسك دائري .. ثم فالبديهي ان عضمك ياخد شكل رأسك الجمجمه Skeleton لانه مينفعش راسك تبقا دائريه وجمجمتك مستطيله .. نفس الشىء في الخرسانه .. لو القطاع دائري تسليحه بياخد شكله .. يعني العمود لو Vertical يبقي التسليح رأسي .. لو العمود Inclined هيبقي التسليح Inclined.. يعني مثلا قاعده مسلحه Reinforcement Footing بيكون ليها طول Length وعرض width وسمك Thickness عشان كده بنلاقي شكل الحديد حرف U ..

الانسان لما بيمشي فالشارع بتقابله نسمه هواء من كل إتجاه .. لو قوه الهواء دي عاليه والانسان وزنه مش تقيل او طويل ولو معرفش يثبت نفسه فالارض هيقع .. او لو مثلا راكب لعبه متحركه هيحصلك إهتزاز Vibration .. الاهتزاز دي بيجيلك من تحت رجلك يعني بيكون ف ال Base اللي انت واقف عليها ..

نفس الشىء للمبني .. بيجيله أحمال جانبيه Lateral Loads اللي هيا زلازل ورياح Wind and Earthquake .وكل ما طول المبني يزيد كل ما تاثير القوي دي يزيد ..

لتحميل كتاب اسباب صدأ الحديد وكيفية علاجة اضغط هنا